بتبعديني عن حياتك بالملل
وخلتيني اقول خلاص مافيش أمل
استمري هتخسريني
استحالة هتكسريني
وحسسيني انك حجر
او ورده دبلت ع الشجر
صبرت صبر غريب رهيب لا يحتمل

وبتوهمينى انى ظلمتك وانى غربتك هزمتك
عملت ايه يجرح كرامتك
كل اللى ممكن اعمله معاكي اتعمل
بتوهميني ان الحكاية بتنتهي
ابعد وقبل ضياعي منك تندمي

مابقتش بعرف دمعتك من ضحكتك
أصرخ مافيش ولا صرخة مني تسكتك
ما عرفش ليه بتعذبيني
لو بجرحك امشي وسيبيني
ساكته الحياه بينك وبيني
احساسي بيكي راح اكيد
مش محتمل

أنا مش مجنونة

20/5

أى حد بيمر بحالة وفاة - بيبقى اصعب فترة هو اول تلات ايام

لما يكون لسه مش مستوعب - وخصوصا باليل لما يجى ينام

وكل مابيعدى يوم كل مابيبدأ يتعود على غياب الشخص ده

انا مش عارفة أنا بقول ايه ولا هبدأ منين او ايه تسلسل الكلام

بس فى حد عزيز عليا اوى - فى معزة أخويا - والده اتوفى انهاردة

وبجد بجد مقطع قلبى - اوى - ونفسى اعمل له حاجة ومش عارفة

الواحد مش بيبقى عارف يعمل ايه فى المواقف ديه - فعلا

مش بايدى غير الدعاء

___________


ياريت تقروا الفاتحة لوالد هاشم وتدعوله بالصبر وانه ينسى بسرعة

______________

بجد ربنا معاك ويهون عليك ويلهم قلبك الصبر

يلهم قلبك الصبر

ينشبك حلمك فى حلمى

نفسى أعاتبها على اللى أنا فيه

جملة " الدنيا مبتقفش على حد " بنقولها دايما للناس ولنفسنا عشان نصبر بيها نفسنا

أن الحياة هتمشى وان الدنيا مش هتقف وكله هيبقى تمام

هتنام وتصحى تلاقى يوم جديد وشمس جديدة

هتصحى تعمل نفس اللى بتعمله كل يوم

تأكل وتشرب وتنام وتروح شغلك والحياة هتستمر

__________

بس - من رأيى - الجمة ديه غلط

هتصحى اه تاكل وتشرب وتنام وتتنفس وتعمل بيبى وتتفرج على التلفزيون

وتقابل اصحابك وتخرج وكل حاجة ماشية زى اى بنى ادم تانى

بس امتى كانت الحياة كده - الا لو كنا - سورى فى اللفظ - بهايم !!

فى حاجة اسمها مشاعر وذكريات وأحاسيس - حاجات بتأثر فينا اوى أكتر من الماديات

بنعيش أه - بس جوانا حاجة مكسورة

مع الزمن - بتهدى شوية وبتطفى النار بس بتفضل برده موجودة
__________

الحياة بتقف على ناس مروا فى حياتنا

بس مقصدش أى ناس

عادة لما الواحد بيلاقى اللى ادامه ميستحقش - بيبيع

ومش بيهون عليه ولا يقضى لحظة تانية يضيعها فى انه يفكر

ومش هو اللى بيقرر ده - ده قلبه أولا وعقله كمان ثانيا اللى بيجبروه على كده

أنا اقصد الناس اللى سابوا أثر فى حياتنا

ناس أثروا اوى فينا بالايجاب - ومبقوش موجودين لأى سبب من الأسباب

____________

هكمل بعدهم الحياة اه ومش هموت

بس زى ماتكون جايب حديدة ومسخنها اوى وتحطها لثوانى على قلبك

سابوا بصمة او علامة - عمرها ما هتتشال

عمرك ما هتنسى
_____________

معرفش - ممكن يكون فى ناس مش مقتنعة

وبتعرف تنسى وتتأقلم وعندها الدنيا فعلا مبتقفش على حد

بس بحس أن اى حاجة ليها علاقة بالقلب - بتبقى رقيقة اوى وحساسة جدا

قد ما بتبقى جميلة قد ما بتبقى صعبة اوى

____________

لما ربنا خد منى ماما - قررت أنى عمرى ما هتعلق بحد تانى

أبداااااااااااااا

تعبت أوى الفترة ديه فعلا - كان احساس صعب جدا

يارب ما حد يعيشه

كانت أول مرة افقد جزء منى - حتة منى

أول مرة ...

ايوه هى دى - المعنى ده

دى اللى وجعتنى أوى - قلبى مكنش مهيا نفسيا لحاجة زى كده

كنت حاسة انى بقيت مريضة نفسيا - مش مصدقة

مش عارفة انا بحلم ولا صاحية ولا اللى حصل ده محصلش وكنت بحلم

ولا حصل فعلا ومش حلم - ولا ايه بالظبط

وبدأت اقسى اوى على اللى حواليا - بدائل ماما - ان صح التعبير

وأدور على الحاجات الوحشة فيهم عشان مقربش منهم

ولو قربت ميبقاش للدرجة

بس من أمتى كان القرار بأيدينا !!

_________

من أمتى كان القرار بأيدينا !!