أولا : أنا اتجننت .. ده بجد

واول مرة احس ان الجنان ده حاجة حلوة قوى .. الواحد بيبقى غايب عن الوعى بشكل كبير

وبالتالى لا يحاسب على اعماله ولا واعى للى بيحصل حواليه



ثانيا: طظ فى كل واحد بيتصل بيا عشان يعرف اخبارى وبس ويقارن مين الاحسن

او يوهمنى انه مهتم :riri:

فأحب اقوله بالمناسبة السعيدة دى

eine Grosse Toziation

الالمانى ده من تأليفى عشان لو حد بيتعلم المانى ميخدهوش على محمل الجد



ثالثا: هى مصر كانت بتفكر فى ايه وهى بتعمل سندوتش بطاطس ميكس ؟

ايه الحقارة وقلة الادب دى ؟



رابعا : I am that Close



خامسا: ليه الناس لما بتعرفنى لازم ينادونى باسمى واسم بابا ؟

مش لازم الناس تنادى عليا ياريهام يارمضان او واحدة بتتكلم عليا دى فتقول ريهام رمضان عملت كذا

محدش بيقول ريهام بس

أنا لاحظت الموضوع ده كتير قوى .. ما يقولواريهام بس

من ايام الجامعة والشغل وانا لاقية الناس بتنادى عليا بالاسمين معرفش ليه



سابعا : أنا بحب ياسين قوى .. لما بيجى ينام على صدرى لازم يفتح دراعاته الاتنين على الاخر..

كانه حاضننى بالظبط ويفضل ماسك فى لبسى وقافل عليه قوى عشان يبقى حاسس بامان

ومتأكد انى مش هشيله منى ووديه السرير ينام لوحده

Unbelievble Moment ...



بس خلاص كده

انا مش عارفة ابدأ الكلام منين بصراحة ومش عارفة اصيغ اللى جوايا

واسلوبى فقير جدا فيه طابع طفولى كالعادة ومش هيساعدنى

بس اعتقد ان اللى حساه جوايا دلوقتى اكبر من

اى حاجة تانية

__________________

عايزة افضل اقول الحمد لله فى كل لحظة بنتنفس فيها لحد مااموت

واقولها من قلبى قوى بكل احساسى وجوارحى

ربنا ده كبير قوى – اكبر من كل حاجة فى الدنيا دى كلها

ورغم كده احنا غاليين عنده قوى لدرجة انه بيخلينا

نكلمه فى اى و وقت كده من غير مانستاذن او نحضر من قبلها فى الكلام

دايما موجود عشاننا – عمره ماحسسنا انه بعيد عننا او اننا لوحدنا فى الدنيا دى

فى كل وقت موجود عشاننا – مهما كانت الظروف

وعمرنا ما روحناله / لجأناله ورجعنا زى ما احنا

__________________

امبارح كنت واقفة فى البلكونة بتفرج على السما بليل - كالعادة - جاتلى نوبة النفس

ومرة واحدة الدنيا لفت بيا ومش عارفة اقف على طولى ووقعت

ريحت شوية كده على السرير وقمت اتوضيت وصليت

مكنتش قادرة اخد نفسى خالص ووشى شبه اللمونة الحمضانة

احساس غريب بجد – كأن حاجة دخلت قلبى كده ونضفته قوى وخليته ابيض وشالت منه كل حاجة مضيقانى

عارفين تأثير الكلور الابيض لما يتحط على الهدوم الملونة؟

__________________

جيت انهاردة بليل حاولت انام معرفتش قمت مرتين ورجعت نمت تانى – مفيش

وبدات تجيلى نوبة النفس تانى – حاولت اشغل وقتى واكلم اى حد على الموبايل – كله نايم

حسيت انى لوحدى قوى – شغلت التليفزيون والنت وشغلت النور وكل حاجة عليت صوتها عشان اشغل نفسى

كنت هموت واكلم اى حد وقتها افضفض معاه

اختى نايمة جمبى والتانية كلمتها مش بترد اكيد نامت هى كمان

دخلت اقف فى البلكونة تانى افتكرت امبارح - فدخلت اتوضيت وصليت

وانا بسجد وبدعى ربنا استوعبت قد ايه ربنا ده كريم قوى

انه سايبلنا فرصة ان احنا نروحله ونكلمه كده فى اى وقت

انا كنت محتاجة قوى اى حد اكلمه وقتها - كنت حاسة انى هموت لو ملقتش حد اكلمه

فما بالك بقى انى الاقى ربى مستنينى انا اسجدله واكلمه - اللى هى ولا حاجة اصلا؟

وعمرى ما لجأتله الا ووقف معايا قوى

ولا كأنى عصته فى يوم من الايام

مع انه ملك وعظيم قوى واحنا مجرد عبد عنده وعمالين شغالين ذنوب

بس دايما موجود عشاننا وعمره ما سابنا

___________________

يارب ..

فى حاجة انا حسيتها وانا بسجدلك – بس خايفة يكون اللفظ حرام

بس انت ادرى بنيتى ونفسى اكتب اللى انا حساه ناحيتك

انا حسيت بحنان ابويا – حسيت بحنانك وقوتك فى نفس الوقت

حسيت انك كل حاجة ليا فى الدنيا

حسيت بحنانك قوى بجد

حسيتك بتطبطب عليا

حسيتك حاسس بيا قوى – حسيتك بجد حاسس بيا قوى

انا عايزة اقولك كلام كتير قوى بس حساه عمره ماهيكفى

انا كل مرة الكلام والتعبيرات مش بتساعدنى اعبر عن اللى جوايا

بس المرة دى حاسة انى مش محتاجة اكتب كلام او ازعل ان الكلام مساعدنيش

عشان انت عارفنى اكتر منى وعارف جوايا ايه من غير ما اقوله

انا بحبك قوى

الحمد لله على نعمة الاسلام

الحمد لله على نعمة السجود لك فى اى وقت

جاتلى من شوية حتة مكالمة

حاسة انى عايزة اولع فى اى حاجة ادامى دلوقتى

نفسى اجيب كرتونة بيض ابيض مش بلدى – عشان البلدى صغير

واقف على بعد كبير من الحيطة وارمى باقصى ما عندى

سمعت شوية كلام يحرق الدم بجد

كان حد جاب طبق وحط فيه ملح ولمون وقعد يخلطهم جامد

وراح رماهم مرة واحدة على الجرح

الله يخربيت كده بجد

هى الناس ليه مش بتفكر قبل ما تنطق ؟

واللى يضحك بقى ان الناس بتتصل بليل بعد 12 وقت العرض بتاع حكاوى

عشان يحرقوا دمك بروقان وبراحتهم

مش عارفة اقول ايه بس

ياريتنى ما كنت ما رديت

حاسة بدموعى وكأنها واقفة فى زورى

استغفر الله العظيم

جمل أفلام بحبها 1

الا غضبك ده يا اما ... ده انا مستوى

فيلم رمضان مبروك ابو العلمين حمودة

_____________

اصعب حاجة لما تحب انسان وتتعلق بيه وتلاقى نفسك فجأة مش من حقك حتى

انك تسلم عليه لما تشوفه

عمر وسلمى

_____________

أنا مغرورة بيك مش عليك

حبيبى دائما
_____________


ياسيدى اهه كله برتقال

العيال كبرت
_____________


سنين وانا بصبر نفسى بطعمك اللى مادوقتوش .. بحبك اللى ماعشتوش

بلعن غيبتك عنى كأنى انا الغايب .. حطيت فى ضهرى الظلم كأنى انا الظالم

دكان شحاته ( مش بحب الفيلم ده )
_____________


كل مشاكل الحياة هى الحب.. انى مش عارف احب او مش عارف حد يحبك او مش لاقى الحب

او بتحب ومحدش حاسس بيك

حب البنات
_____________


اه ممكن اكون غلطت فى اسمك ... غلطت فى ريحة البرفيوم بتاعتك ..

بس احساسى بيك مقدرش اغلط فيه

- الوقفة دى مش من حقنا

نور عيني

_____________


انا مش هقدر اعيش لحظة واحدة وهو فى حضن واحدة تانية

انت عمرى ( مش بحب الفيلم ده )

____________________


فى بوست عملته امبارح ومخدش حقه اتظلم عشان عملت بعده على طول بوست تانى

وهو من البوستات الغالية عندى فلازم يعيش لحظته هو كمان


كلمات اغانى بحبها 1

ماما وحشتنى قوى

بجد قوى

مفتقدة وجودها فى حياتى

_______________

بس اقولك على حاجة ومتزعليش منى

انا بقيت بهرب منك ومش بحاول افكر فيكى او افتكر اى حاجة كانت بينا

ولما بتيجى على بالى بهرب بنفسى فى اى حتة تانية بعيد عنك

اصل انا بتوجع قوى لما بفتكرك

بفتكر انك مش جمبى

وانا مبقتش عايزة اتوجع - تعبت من الم الذكريات

بس انتى - رغم كل ده - بتعاندينى دايما وبتجيلى

________________

اكتر حاجة مفتدقاها فيكى اليومين دول - ثقتك فيا

وحشنى ثقتك فيا

_________________


وقت الوفاة قولتيلى متخافيش ياريهام وكانت دى اخر حاجة سمعتها منك

وبليل بعد العزا وانا بنام على سريرك حسيت بيك بتكلمينى وقولتيلى تانى متخافيش عليا ياريهام

انا عمرى ما كنت خايفة على نفسى

أنا كنت خايفة عليكى انتى

انا فعلا كنت شايلة هم اللحظة دى

كنت اقعد افكر بالساعات لو حصل لك حاجة فى الشارع او لوحدك ومحدش جمبك هتتصرفى ازاى

فعلا كنت دايما خايفة عليكى

فاكرة لما كنا مسافرين السعودية بالباخرة ساعتها طول الرحلة كنت شايلة هم لو السفينة غرقت فى البحر

ياترى ماما هعرف انقذها ولا لأ ؟

وكنت لازقة فيكى طول ال3 ايام عشان لو المركب غرقت اكون اول واحدة جمبك

كنت دايما خايفة عليكى

انا دلوقتى متطمنة انك عند ربنا ... اكيد فى مكان احلى

لأنك ست عظيمة قوى

بس انا مفتقدة وجودك جمبى مش اكتر

ساعات كتير ببقى محتاجة احس انك جمبى وبس

ساعات كتير ببقى محتاجة اتكلم معاكى واخد رايك

ساعات كتير ببقى عايزة احضنك وبس

ساعات كتير ببقى عايزة افضل ابوس فيكى وبس

ساعات كتير ببقى عايزة احس انى طفلة تانى ومش شايلة هم

ساعات كتير ببقى عايزة اسمع ضحكتك واضحك معاكى

ساعات كتير ببقى عايزة اعيط على صدرك زى الطفلة

____________

على فكرة انا بقيت شبهك قوى

كل يوم بيعدى بتقرب ملامحى منك

كلمات اغانى بحبها 1

العسيلى

بحب اغانى العسيلى قوى

الوحيد الى ممكن اسمع اغانيه فى اى وقت وفى كل مود

الوحيد ...

صوته حلو قوى - كلماته مجنونة وغريبة ومختلفة ومطرقعة

وانا بحب قوى اى حاجة جديدة ومختلفة - تلاقينى لزقت فيها على طول

أموت وأعرف انا بعمل شرط كتير ليه :huh:

المهم ..

عامل زى منير فى حتة انه متميز شوية فى اغانيه

مش شبه ناس كتير – متلاقيش ناس كتير بتغنى نفس المعنى وبنفس الالفاظ

يعنى من اللفظ فى الاغنية ممكن اعرف ان ده العسيلى

يعنى تررم ومجنونة دى معتقدش انها اتعملت حاجة زيها قبل كده

طريقته فى نطق الكلمات حلو قوى – مناسب لمود الاغنية جدا

عندنا فى الالمانى اسمها

Betonung

حاجة عاملة زى فن النطق كده – امتى ندوس على حرف معين فى الكلمة على حسب المعنى وكده

حقيرة عنده الحتة دى – زى كلمه حبيبى اللى بيقولها فى اول اغنية هشوفك

حقيييييييييييييييرة ( حقيرة دى المفروض زى واو يعنى- معناها ايجابى )

______________

فى اعتقادى انا – ان الست يتقال عليها جميلة من روحها وخفة دمها وضحكتها وحبها للحياة وحنيتها

مش من جمالها الجسدى ولا شكلها – روحها تبقى حلوة وخفيفة يعنى

ده فى نظرى انا يعنى – اكيد الرجالة بتبص من منظور تانى خالص

الحلو بقى ان فى كل اغانى العسيلى دايما بيتكلم عن النقطة دى

دايما يتكلم عن روحها وحريتها وخفة دمها وشقاوتها وحضورها وحنيتها

متكلمش عن جمال شكلها او شفايفها – دايما بيتكلم عن انها شقية او مجنونة

عن ضحكتها ونظرة عينيها مثلا

بحب الحتة دى جدا فى اغانية

_____________

مينفعش اكتب الجمل اللى بحبها كده من اغانيه – لازم اسمع الاغنية كلها واعيش فى المود بتاعها

وبعد كده اختار الكلمات

فممكن الجمل دى متحسوهاش غير لما تسمعوا الاغنية – عشان الاحساس يوصلكم

_____________

( وفيها ايه ... من نفسى تحمينى )

متسبنيش

) بس الكلام مش كفاية .. واخترت انت اسهل الحلول )

حكايتى معاك

)كفاية عليا انك جمبى)

ملك مدينة

)وربنا يعلم حبيتك قد ايه)

طول ما انتى جمبى

)كنا اتنين وهنبقى واحد طول عمرنا )

بيتى ومطرحى

)من امتى قدرت ارفضلك طلب .. حتى نجوم السما حاولت اجيبهالك )

حاضر

)اصل انتى فيكى الحياة )

فيكى الحياة

) واديها هتطير من ايدى)

ولا لأ

)لو كان ابوها سماها تررم كان وفر وريحنا )

ترررم

)الحنية والحلاوة والحرية والشقاوة والطعامة واللذاذة دى كنافة دى بقلاوة)

ترررم

)قالوله شعرها لسه قصير وضحكتها بتطير أجمد قلب من مكانه )

هشوفك

)املى منك عينيا )

هشوفك

)يا للى مسافرة وانتى جمبى )

حمد الله على السلامة

الاغنية دى حلوة بجد جداااااااااااااااااا- معنى الاغنية بجد حلو قوى

)مين يطول يعيش فى حقيقة فى زيها فى الجنة )

الفستان الابيض