الجملة اللى بتتقال فى الافلام بمعنى انا حاسس \ حاسة باللى جواك \ جواكى ... ماهى الا بولشيت 

عمر ما فى حد هيحس باللى جواك الا لما يتحط مكانك 

وش كده 

اه فيها تقدير ان اللى قدامك بيحاول يحسسك بالمشاركة الانسانية :riri: 

او انه يحسسك انك مش لوحدك وانه معاك 

بس حتة انه يكون حاسس زيك باللى انت حاسه .. معلش فى طبق رز بلبن مستنيك فى الركن البعيد 

____________________

هههههههههههههههه

يعنى ايه بجد الواحد يبقى ناسى شكل ابوه وأمه 

حد يقف يفهمنى 

يعنى ايه يبقى نفسى اكتب رقم ماما واكلمها احكيلها وملقهاش

وملقهاش فى البيت ولا فى الشارع .. لأ دى مش موجودة ف الدنيا 

____________________

بس ربنا ليه حكمة 

وحكمة كبيرة قوى 

____________________

خليكوا رحماء بعباد الله يرحمكم الله 

____________________

لولا الاكل لكانت الحياة لاتحتمل 

ده مثل رومانى  تقريبا

لو اللى ألف المثل ده لسه موجود معانا كان ضاف البيبسى وشيكولاتة باونتى والنسكافيه الصبح 

____________________

اغانى عمرو دياب زمان ... كانت حلوة بشكل قليل الادب 

كان حاسسها قوى 

صوته اصلا كان حاسس بكل كلمة  بيقولها 

غير دلوقتى

____________________

ومادام بتحبينى ... بتعملى كده ليه معايا ؟

 ليه بتوجعينى كده ؟ 

____________________

ومستحيل ياحزن راح تسكن 

I just miss my mom so much 

__________________

اللى يعرفنى  وقرب منى قوى.. مبيعرفش ينسانى 

مش عشان حاجة 

 بس انا عمرى ماعملت حاجة وحشة فى حق حد عرفته 

____________________

اللى عمل شيكولاتة باونتى .. كان فى حالة من العشق متتوصفش 

كان فى اقصى حالات الفرحة 

______________________

هو ربنا دايما ليه حكمة ف كل حاجة 

ومفيش حاجة بتفضل  ع حالها

مفيش حاجة ابدا بتفضل ع حالها 

الله اعلم بكرة هيحصل ايه ! 

_______________________

أجمل ما فى الحب انك تعبر عنه والاجمل ان يوصلك الاحساس ده

___________________

 يعنى ايه انا نسيت ملامحهم ؟؟ يعنى ايه بجد ؟ 

_____________________

مالك ياحبيب ماما ؟ 

_________________

قلبى مليان بحكايات .. فاكرة يابلدى؟ 

__________________

انا بكره الراجل الجبان .. اللى هو مش راجل اصلا 

_________________

 I am not proud of my self 

_______________

 لما تحس انك متضايق قوى ... افتكر اللى اقل منك 

افتكر ان فى حد مش بيشوف ... طول الوقت قاعد ف ضلمة 

ان فى حد قاعد طول اليوم ع كرسى مجربش احساس الجرى

ان فى حد جعان ومش معاه فلوس ياكل 

ان فى حد عنده ابتلاء اكبر منك بكتير قوى 

افتكر ده دايما وقول الحمد لله ع كل حال 

خليك دايما فى حالة من الرضى

  _______________

أصل ده كتير عليا 

__________________

لما تيجى تحلم ... احلم دايما بالحاجة الأكبر من الحاجة اللى انت عايزها

عشان لما متتحقش ويتحقق الاقل منها يبقى حققت اللى كان نفسك فيه 

_________________

نفسى تحصل معجزة

______________

الكيك اتخلق عشان يتشرب مع الشاى 

دى حقيقة وواقع 

_________________

محدش يقول انه زيها 

عشان محدش زيها 

______________

ليه اشترى بيجامة وانا ممكن اجيب تيشيرت عاجبنى وبنطلون لايق عليه

ليه لازم اجيب اللى فوق لون اللى تحت

ايه الروتينية دى وتقفيلة الدماغ  ديه

_________________

كان نفسى اكون زيك 

أوعى تكونى زيى 

_______________

كل سنة وأنتى بنتى اللى مخلفتهاش

لما بتقع كوباية مننا بتتكسر لحتت

 لو جينا بقى وكسرنا الحتت دى تانى هتبقى فتافيت 

يعنى الفتافيت دى قزاز متكسر 

زى ما هو موضح بالشكل الاعلى رقم 4 

وده كان شرح كلمة فتافيت 

وياريت حد يبقى يكنس الارض 

 

عشان محدش يتعور من القزاز

 

بس خلاص كده تقريبا 

بقى عندى 26 سنة

I m now married to Amr Fekry 

Believe it or not ! 

____________________

لسه بتيجى عليا اوقات كتير قوى لحد انهاردة وابقى لسه مش مصدقة 

_____________________

امبارح جيه فى بالى .. ان احنا لما نخلف ان شاء الله 

هنكون عيلة - كده يبقى احنا كونا عيلة حتى لو كانت مصغرة 

أنا ممكن اصلا قلبى يقف من الفرحة ساعتها 

ريهام وعمرو وابنهم / بنتهم 

يالهوى ! 

____________________

الجواز .. محتاج الحب قبل أى حاجة تانية 

الحب رقم واحد ومن الطرفين 

لو ناقص من عند طرف .. الحياة هتبقى صعبة قوى 

___________________

اللهم لك الحمد والشكر كما ينبغى لجلال وجهك وعظيم سلطانك

اللهم لك الحمد حتى ترضى 

___________________

تقريبا عمرى فى حياتى ماتمسكت بحاجة قوى كده أو حسيت انها صح 

دايما كنت بتردد او بقول لأ اكيد انا غلط وارجع ف كلامى 

بس دى أول مرة احس ان اختيارى كان صح - لأول مرة 

صح ف كل حاجة 

_________________

مفيش كلام ممكن يوصف حبى ليه 

مفيش كلام 

_________________

يارب الحياة تفضل كده ع طول 

والاحساس ده ميقلش 

_________________

هو أنا وانا هو 

احنا حاجة واحدة 

مينفعش دلوقتى خلاص تتقسم 

_______________

مرة قولتلك زمان - انا نفسى ابقى دايما حواليك ومعاك - ايا كان المسمى 

دلوقتى انا من حقى انى اكون دايما معاك - ف كل وقت - اكتر من اى حد تانى 

______________

ساعات كتير بفكر ف شكل حياتى - لو مكنتش فيها 

مكنتش هتبقى حياة اصلا 

فاكر مثال الملوخية من غير طشة 

 مفيش لا طعم ولا روح 

حتى لو كان ربنا اراد وقابلت حد تانى - مكنش هيبقى زيك 

 أنت مفيش زيك اصلا 

U r one in a million 

________________

وايه تانى فى حياتى ناقصنى .. وانت ف حضنى وانت لامسنى

_________________

ربنا يخليه ليا ويحميه من كل شر ويرزقه دايما بالخير 

ويكرمه ويرفع من قدره ويكون دايما أحسن منى 

رمشة عين .. محتاجة رمشة عين 

_____________

منير 

ثم منير

ثم منير 

ثم منير

______________

متحاولش تلبس حاجة مش مقاسك 

او حتى مقاسك وانت مش مرتاح فيها

البس اللى يريحك / اللى بيعبر عنك أنت 

_______________

فى حاجات بتبقى بسيطة قوى - بس بتبقى غالية قوى فى احساسها ومعناها بالنسبة للواحد

وحاجات تانية بتبقى غالية قوى فى قيمتها - بس بالنسبة للواحد ولا حاجة 

ودى مشكلة فى حد ذاتها فى الحياة 

_____________

لما بشوف ضحكتك بتدينى احساس ان الدنيا لسه بخير 

الابتسامة اللى هى من غير صوت دى - بتبقى هادية قوى ورايقة

ومع انك كتير بتعمليها بس  فى عينيكى حاجة تانية 

_____________

 أنا مش عايزة حد يلمسنى ياريهام - عايزة احضن نفسى وبس

لحد مااروح فى النوم 

____________

مثل يونانى: لولا الأكل .. لكانت الحياة لا تحتمل

كل ماتتزنق .. ارمى خضار فى الحلة 

____________

     

 * ( شمس فى عز البرد) 

 

______________

أحلى حاجة فى الصيف المراوح وصوتها 

ولو فى تكييف - أظن ان احنا كده خلاص عدينا ومش ناقصنا اى حاجة فى الدنيا خلاص

 

 التكييف عامل زى الشاى  

________________

الجزر بقى طماطم 

________________

  منير صوته مش واو ع فكرة  - بس كلمات اغانيه واحساسه وطريقتة فى النطق والضغط على جمل معينة .. فزيع 

 _______________

بس لازم يكون فيها كحل ومسكرة

حاسة كأنى اول مرة اخد اجازة من عشرميت الف سنة مثلا ولا حاجة 

ومع انى بنام ع روحى لانى صاحية من 5 الفجر بس بقاوم عشان استفاد من كل فسوة 

بقالى كتير قوى مقعدتش ع الجهاز كده لوحدى وشغلت الاغانى اللى بحبها وبشرب شاى

 والكوباية عليها رسمة شاى ليبتون اللى بحبها  وبسكوت لمبادا

يعنى اتحققلى كل حاجة بحبها 

ومحدش معايا فى الاوضة 

عايزة اثبت الوقت  

بحب حاجتى قوى 

فى حاجات هبلة جدااا عندى ومتخلفة جدا ويمكن تكون قيمتها بسيطة قوى 

بس بالنسبة لى كبيرة قوى 

بتبقى من الحاجات اللى ممكن تخفف عنى شوية 

 مش عايزة اتكلم فى الموضوع ده

 

حب الناس للواحد / ارتياح الناس للواحد نعمة

مفيش حاجة ع الارض ممكن تقدر ده او توازيه 

ماما وحشانى بشكل قليل الادب 

نفسى اشوفها قوى 

ولو من بعيد وملمسهاش بس اشوف وشها 

ملامحها وحشتنى قوى 

هى وحشتنى قوى 

بقالى كتير قوى مندهتش اسمها 

أنا سايباها دايما ع ربنا

وربنا دايما واقف جمبى 

الحمد لله 

مش عايزة افتكر اللى  كان 

مفيش أحلى من بلدى 

ومفيش أحلى من ناسها وطيبتهم

نفسى اعرف منير كان بيفكر فى ايه وهو بيقول الكلمات دى 

ولا طريقته وهو بيتنهد وسط الاغنية او بياخد نفسه او بيبلع ريقه 

بيبقى حقير