selfmeaning

Self-meaning

يمكن لو كانت واحدة صاحبتى من تلات أربع سنين .. مكنتش عملت البوست ده.. لأن ده الطبيعى أنها صاحبتى جدا وعارفين بعض من وقت طويل وعشنا مع بعض ايام جميلة وايام صعبة

هكلمك بصراحة :)

أول مرة كلمتينى على الموبايل.. قلت عااادى.. زاى ناس كتير ولازم يقدموا سبورت فى الاوقات زى ديه.. ولما لقيتك بتكلمينى كل يوم تقريبا.. قلت عادى عشان احنا جيران بغباء وده الواجب برده

لما الموضوع عدى كام شهر .. التليفونات بتاعت الناس اللى اعرفها ومعرفهاش بدأت تقل .. كنت بستقبل فى اليوم حوالى 10 مكالمات من ناس والله لحد دلوقتى معرفهاش والى يقابلنى فى الشارع يسلم عليا وحاجات غريبة .. وكنت متوقعة أن كل الهلمة ديه هتخلص فى وقت قريب

عادى فى ناس بتظهر فى الاوقات ديه وبتعمل الواجب زى مابيقولوا يعنى عشان يبقى اسمهم جم وشفتهم وعملوا اللى عليهم وممكن جدا وهم نازلين على السلم تسمع ضحكتهم .. عادى جداااا.. والبعض التانى يجى عشان يتفرج ويسأل أسئلة غريبة جدااااا.. أنا فى ناس والله العظيم جت تسألنى بتقبضى كام !!!

المهم .. ما علينا

جيت بعدها قررت انى ابعد بقى عن المجاملات .. وبجد تعبت .. تعبت انى اخرج من اوضتى . .أقصد اوضتها لأنى اخدتها ليه فى الفترة ديه ... واطلع اسلم على ده وعلى ده واجامل ولازم اضحك عشان لو عيطت مش هنخلص من ده يوم

جيتى انتى بعدها لما لقتينى مش برد على الموبايل .. لقيتك بتكليمنى فى البيت ... اللى بجد استغربته فى الأمر.. صوتك

قد ايه زعلانة اوى عشانى ... لقيت نفسى عمالة احكيلك عن حاجات كتييييييييييييييير وانتى ساكتة.. وبتسمعى وبس.. قد ايه بحب اللحظة ديه...

اليوم اللى جيتى فيه العزا.. استقبلتينى بابتسامة عريضة أوووووووووى..استغربتك أوى .. كل اللى بيجى بيبقى زعلان ويقعد يفكر فى القديم ويحكى عملت ايه معاه.. كنت بجد بتضايق لأنى مش بحب افتكر ... كنتى مختلفة

قعدنا تقريبا نص ساعة .... مش عايزة اقولك كنت مبسوطة قد ايه ... حاسة انك فهمتينى أوى .. وقعدنا نحكى فى حاجات تانية كتييييييييييير... حتى كان صوت ضحكتى عالية أوى .. فاكرة اليوم ده أوى

مع الوقت .. بقول اكيد هيجى يوم وهتقل الاتصالات بينا .. أحنا مشفناش بعض غير يوم واحد .. بس بجد مع كل يوم والله غلاوتك بتزيد عندى :)

أنتى جميلة أوى
...............................

اللى خلانى أكتب البوست ده.. أن واحدة صاحبتى بتكلمنى من يومين .. وبتقولى أحنا كده يبقى عدى سنة بالظبط على صحوبيتنا.. هى برده شخصية تانية انا بحبها جدااااا وعرفتها فى الوقت ده بالظبط .... ساعتها جيتى انتى فى دماغى وناس تانية هم عارفين نفسهم كويس قد ايه قربوا منى فى الوقت ده