زمان لما كان يبقى عندى مشكلة فى مادة واحدة والامتحانات خلاص قربت
افضل اقول ده انا لسه ورايا كمان مادة كذا وكذا وكذا
واجيب كل المواد كأنى مذاكرتش اى حاجة من أول السنة
وافضل اعيط واصوت فى الشقة
كل مرة فى وقت الامتحانات بعمل نفس الحركة ديه
بحسس نفسى انى فاشلة فى كل حاجة وافضل اجيب القديم والجديد
ولاكأنى كنت بعمل حاجة من اول السنة
ومش ببقى عايزة حد يكلمنى ولا يقولى اى حاجة تهون عليا
بحس أن اقل كلمة هتجرح او توجع
يعنى لو حد قالى طب هتلحقى تذاكرى مش عارف ايه ولسه فى وقت
اتضايق - ليه بقى !! - لأن معنى كده انى فعلا مذاكرتش - متخلفة رسمى
لازم اللى قدامى يقعد يقولى لأ انتى شاطرة
ومخلصة المذاكرة من اول السنة وبطلى هبل
مرة الساعة 3 الفجر فى رمضان كان صابح عندى امتحان عربى اعدادية
جالى حالة انهيار وقعدت اعيط بشكل غريب - انا نفسى كنت مستغربة نفسى
وكل ما حد من اخواتى يقولى حاجة " اسهرى لحد الامتحان أو اقرى الملخص"
افضل اعيط أكتر واضرب فى الكتب اوى واقعد اخبط راسى فى المخدة جامد
دخلوا يصحوا ماما قالولها بنتك ريهام اتجننت برة
ماما قامت مفزوعة من النوم - قعدت تشتم فيا وقالتلى انتى مخلصة ومذاكرة
قومى خشى نامى يا *******
فى اليوم ده قمت اخش انام وانا بضحك أوى من جوايا وفرحانة انها عملت كده
قمت وسبت الطربيزة عليها خمستلاف كتاب وورق بالهبل
و مناديل مكان ماكنت بعيط
دخلت السرير أنام جمبها وانا فرحانة اوى - أوى
انها عملت اللى كنت عايزاه من غير مااقول
انا نفسى مكنتش عارفة انا عايزة ايه ولا ايه اللى المفروض يتعمل
عشان اسكت واعرف انام
_____________
العيب مش فى الدنيا خالص
العيب فيا أنا
العيب فيا انا
