كنت فى سنة رابعة كلية ولسه واخدة الاجازة ونايمة بغباء - لقيت ناس بتخبط على الباب قمت بصيت من العين السحرية لقيتهم اصحاب ماما - لقيت ماما مش فى الشقة وانا لوحدى نفضت قولت شوية وهيمشوا - لو دخلوا هعمل معاهم ايه وماما مش هنا اصلا شوية ولقيت ماما جت وفتحت الشقة ودخلوا معاها قولتلها معلش ياماما انا مكنتش عارفة استقبلهم اعمل ايه وانتى برة وعوقبال ماتيجى هيكونوا مشيوا
قالتلى ولا يهمك ياحبيبتى معلش قلقتك من النوم
قلقتك من النوم !!


هو أنتى مش هعاتبينى حتى !!
_____________

دخلت المطبخ وانا مخنوقة اوى انى عملت كده ولقيت رد فعلها كده - دخلت عملت صينية شاى تلات كوبايات شاى وكوباية ماية والصينية طبعا ماما كانت بتشرب معلقة واحدة ونعناع على خفيف - لقيت ماما دخلت ورايا المطبخ قالتلى شكرا ياريهام انك عملتيلى الشاى وشكل الصينية جميل اوى شرفتينى ادام الناس
معلش مكنتش قادرة اعمل انا الشاى

شاى ايه اللى تعمليه !!
____________

ساعات كتير لما بحس انى ناقصة ادام نفسى او حسيت انى قصرت اوى بتخنق جدا ومبعرفش اتكلم فعلا مبعرفش اتكلم - مبعرفش اقول انا اسفة او انا غلطانة او ايه اللى بتقوليه ده بحس بضغط عالى اوى و صداع فى اليمين وفى حاجة فى زورى - مبعرفش انطق

___________


أنا وقتها كنت عايزة اقولك صينية شاى ايه الى بتتكلمى عليها بتشكرينى على صينية شاى!! ايه اللى بتقوليه ده انا مش عارفة اعلق على حاجة - انا كنت داخلة اكتب البوست عشان اقول الكلام اللى مكنتش قادرة اقولهولك فى وشك اكتشتفت ان من كتر الكلام مش عارفة اقول ايه
مش عارفة اقولك ايه

____________

وانا بكتب البوست دلوقتى افتكرت جملة عادل امام فى فيلم التجربة الدنماركية
لما كان بيعلق على بوسة البطلة فبيقارن بينها وبين مراته
فبيقولها ده مكنش بوس ده كان تطعيم
اهه انا دلوقتى بتطعم يوميا والحمد لله


فرق شاسع